१३ माघ काठमाडौं । प्रधानमन्त्री कार्यालयका सचिव कृष्णहरि बास्कोटाले काठमाडौं उपत्यकाको बाटो फराकिलो पार्ने अभियानले गति लिन नसक्नुको दोष केही मुलुकका दूतावासहरुलाई दिनुभएको छ । अमेरिका, चीन, रसिया र इटालियन दूताबासले सडकको मापदण्डमा परेको पर्खाल नहटाएको सचिव बास्कोटाको गुनासो छ ।

प्रधानमन्त्री कार्यालयको जिम्मेवारी सम्हाल्नुभएका सचिव बास्कोटा यतिबेला काठमाडौंको बाटो, खानेपानीलगायतका विषयमा बढी केन्दि्रत हुनुहन्छ । कतिपय समयमा भत्केको बाटो निरीक्षण गर्न जाने गर्नुभएका बास्कोटाको स्रोत उधृत गर्दै शनिबार राससले लेखेको छ, ‘स्वीस राजदूतावासले आफ्नो जमीन छोडदिएर जहाँ जति सरकारको नीति हो, त्योअनुसार आफ्नो पर्खाल सारिसके पनि अमेरिकन, रसियन, चिनियाँ र इटालियन दूतावासका केही समस्या रहेको सरकारी अधिकारीले स्वीकारेका छन् ।’

सडक विस्तारका क्रममा सम्बन्धित दूतावासलाई पर्खाललगायतका संरचना सार्न ध्यानाकर्षण गरेको भए पनि ती दूतावासले संरचना नहटाइ दिँदा त्यस्ता कूटनीतिक नियोग रहेको ठाउँमा सडक विस्तारमा समस्या देखिएको बासकोटाको गुनासो छ । सरकारले ती दूतावाससँग यस विषयमा छलफल र समन्वय गर्न परराष्ट्र मन्त्रालयका शिष्टाचार महापाललाई निर्देशन दिएको सचिव बाँस्कोटाले बताउनुभएको छ ।

बेलायती सहयोग नियोग (डिएफआइडी) ले भने आफ्नो पुरानो पर्खाल भत्काएर सडकलाई जग्गा छाडिसकेको उहाँले जानकारी दिनुभएको छ ।

त्यसैगरी काठमाडौँ उपत्यकाभित्रका सडक विस्तार गर्ने सरकारको नीतिअनुसार हालको चक्रपथलाई स्तरउन्नति गरेर आठ लेन चौडा बनाइने र चिनियाँ सरकारको सहयोगमा पहिलो चरणमा चक्रपथ विस्तारको काम कोटेश्वरदेखि सातदोबाटो हुँदै कलङ्कीसम्म गरिने बास्कोटाको भनाइ छ ।